Läbenshof für Chliitier
Üse Hof überchunt Zuewachs vo Chliitier. Tier wo uf angerne Höf müesse wiiche, si bi üs willkomme. Si dörfe do aus die seelevoue Wäse, entsprächend ihrne Bedüfnis es schöns Läbe dörfe füere.
Hie si mir dankbar, wenn du üs mit ere Pateschaft ungerstützisch u so der Ungerhaut und d'Pfleg vo de Tier hüufsch sichere.
Informatione zure Pateschaft
Müglechkeite vore Pateschaft
Bi üs chasch du Teil- oder Voupateschafte übernäh.
-
Bire Teilpateschaft bestimmsch du der monatlech Ungerstützigsbiitrag wo du wetsch zahle für dis userwählte Tier. Es Tier cha somit mehreri Pate ha u du teilsch zäme mit ihne d'Choschte füre Ungerhaut und d'Pfleg.
-
E Voupateschaft deckt de vou Läbensungerhaut vo dim usgwählte Tier.
Duur vore Pateschaft
D'Mindescht-Duur vore Pateschaft betreit 12 Monet und wird vo Johr zu Johr ernöieret. Faus d'Pateschaft us irgend emne Grund mues ufglöst wärde, cha das jederzit vo beidne Syte mit ere schriftleche Mitteilig passiere.
Priis und Verrächnig vore Pateschaft
-
Bire Teilpateschaft bestimmsch du säuber, wie viu du für weles Tier wetsch zahle. Der abgmacht Betrag wird när jährlech verrächnet.
-
Bir Voupateschaft isch der monatlech Bitrag fix und richtet sech nach de Vouchoschte für di jeweiligi Tierart.
Der Läbensungerhaut umfasst Chöschte für Fueter, Betröiig, Stallig, Iströi, Zuunmatriau, Tierarzt, ect. Di Bitrag isch aber ume symbolisch as Patetier bunge, da mir keni tierspezifische Konti füere. Somit verwände mir d'Biträg us de Pateschafte zur Sicherig vom Ungerhaut vo aune Tier wo bi üs ufem Hof läbe.
Was bedütet e Pateschaft für di?
-
Du wirsch zumen Begrüessigsapéro mit Hofrundgang iglade
-
Du darfsch dis Patetier jederzyt bi üs cho bsueche
-
Du profitiersch vo Rabatt uf üsne Produkt
-
Mindischtens einisch im Johr wirsch zumene Burehoftag iglade, wo du aktiv ufem Burebetrieb chasch mitschaffe - sig das bim Blacke stäche, Zuune oder bir Produktehärstöuig. Am Fürobe gits es feins Ässe u mir verbringe zäme e gmüetleche Obe
Risikoabsicherig
Im Rahme vor Pateschaft entstöh für di keni witere Rächt und Pflichte am Tier. So obligt's allei üs, über di medizinischi Versorgig u Pfleg z'entscheide. Das aber immer in Absproch mit dir aus Gotte / Götti.
